by FSDKSH | Jan 10, 2019 | Aktivitete
Çdo vit në 31 maj, Organizata Botërore e Shëndetësisë (OBSH) dhe partnerët organizojnë Ditën Botërore të Luftës Kundër Duhanit. Qëllimi i kësaj dite është rritja e ndërgjegjësimit lidhur me rreziqet që sjell konsumi i duhanit, si dhe advokatimi për ndërmarjen e politikave efektive me qëllim uljen e konsumit të tij. Kjo ditë është shpallur në vitin 1987 nga vendet anëtare të Organizatës Botërore të Shëndetësisë, të cilat u përpoqën të ndërgjegjësojnë opinionin mbi dëmet dhe rreziqet e duhanit, si dhe të inkurajojnë reduktimin e prodhimit dhe konsumit të duhanit.
Tema e këtij viti për Ditën Botërore të Luftës kundër Duhanit është:
“Duhani, një kërcënim për zhvillimin”
Fushata ndërgjegjësuese e këtij viti ka për qëllim:
-Të theksojë lidhjet midis përdorimit të produkteve të duhanit, kontrollit të tij dhe zhvillimit të qëndrueshëm.
-Të inkurajojë vendet që të përfshijnë kontrollin e duhanit në Axhendën e Zhvillimit të Qëndrueshëm të vitit 2030.
-Të mbështesë shtetet dhe shoqërinë civile për të luftuar ndërhyrjen e industrisë së duhanit në proceset politike, duke ndërmarrë masa të rrepta kombëtare të kontrollit të duhanit.
-Të inkurajojë një pjesëmarrje më të gjerë të publikut dhe partnerëve në përpjekjet kombëtare, rajonale dhe globale me qëllim zhvillimin dhe zbatimin e strategjive të cilat i japin përparësi veprimeve konkrete lidhur me kontrollin e duhanit.
-Të demostrojë sesi individët mund të kontribuojnë në krijimin e një bote të qëndrueshme pa duhan, duke mos marrë kurrë produkte duhani ose duke hequr dorë nga duhanpirja.
Kontrolli i duhanit mbështet shëndetin dhe zhvillimin
OBSH-ja u bën thirrje shteteve të përshpejtojnë nismat lidhur me kontrollin e duhanit, si pjesë e përgjigjeve të tyre në Axhendën e vitit 2030 për Zhvillim të Qëndrueshëm.
Qëllimi i Axhendës së Zhvillimit të Qëndrueshëm është që të sigurojë se askush nuk ka mbetur mbrapa. Kontrolli i duhanit është një nga mjetet më efektive që do të ndihmojë në reduktimin e një të tretës në nivel global, deri në vitin 2030, të vdekjeve të parakohshme nga sëmundjet jo të transmetueshme si sëmundjet kardiovaskulare, kanceri dhe sëmundjet pulmonare.
Forcimi i zbatimit të Konventës Kuadër të OBSH-së për duhanin në të gjitha vendet, është një objektiv shtesë që duhet të plotësohet nga qeveritë e këtyre vendeve.
Kontrolli i duhanit ndihmon në arritjen e qëllimeve të tjera globale
Kontrolli i duhanit mund të ulë varfërinë, të kontribuojë në dhënien fund të urisë, të promovojë një bujqësi të qëndrueshme, rritje ekonomike, si dhe të luftojë ndryshimin e klimës. Rritja e taksave për produktet e duhanit mund të përdoret për të financuar mbulim shëndetësor universal, si dhe për të mbështetur programet e tjera të zhvillimit të qeverisë.
Nuk janë vetëm qeveritë që mund të kontribuojnë lidhur me kontrollin ndaj duhanit, por edhe individët të cilët mund të kontribuojnë në nivel individual për të bërë një botë të qëndrueshme pa duhan. Një gjë e tillë mund arrihet nëpërmjet angazhimit për të mos marrë kurrë produkte duhani. Ndërsa ata që janë përdorues mund ta lënë duhanpirjen ose të kërkojnë ndihmë, në mënyrë që të mbrojnë shëndetin e tyre dhe të njerëzve të cilët janë të ekspozuar ndaj tymit të duhanit, duke përfshirë fëmijët, anëtarët e tjerë të familjes dhe miqtë. Paratë që nuk shpenzohen për duhanin mund të përdoren për nevoja të tjera të domosdoshme, si ushqimi i shëndetshëm, kujdesi shëndetësor dhe arsimi.
Disa fakte…
-Rreth 6 milionë njerëz vdesin çdo vit nga përdorimi i duhanit, një shifër e cila parashikohet të rritet në më shumë se 8 milionë në vit deri në vitin 2030 nëse nuk do të ndërmerren nisma konkrete. Përdorimi i duhanit është një kërcënim për çdo person, pavarësisht nga gjinia, mosha, raca, prejardhja kulturore ose arsimore. Konsumi i duhanit sjell vuajtje, sëmundje dhe vdekje. Ai varfëron familjet dhe ekonomitë kombëtare.
-Përdorimi i duhanit i kushton jashtëzakonisht shumë ekonomive kombëtare, nëpërmjet rritjes së shpenzimeve të kujdesit shëndetësor dhe zvogëlimit të produktivitetit.
-Konsumi i duhanit rrit varfërinë, pasi njerëzit e varfër shpenzojnë më pak në gjërat e domosdoshme si ushqimi, arsimi dhe kujdesi shëndetësor. Rreth 80% e vdekjeve të parakohshme nga duhani ndodhin në vendet me të ardhura të ulëta ose të mesme.
-Rritja e duhanit kërkon sasi të mëdha të pesticideve dhe plehrave kimike, të cilat mund të jenë toksike dhe ndotëse të ujit. Çdo vit, për rritjen e duhanit përdoren 4.3 milionë hektarë tokë duke sjellë një shpyllëzim global midis 2% dhe 4 %.
-Konventa Kuadër e OBSH- së për Kontrollin e Duhanit (WHO FCTC) udhëheq luftën globale kundër epidemisë së duhanit. FCTC-ja e OBSH-së është një traktat ndërkombëtar me 179 vende dhe Bashkimin Europian.
Të dhëna nga Shqipëria
Sipas Raportit Shëndetësor të Popullatës Shqipare (2014), duhanpirja përfaqëson faktorin e tretë të rrezikut, përgjegjës për pjesën më të madhe të barrës së sëmundjeve në Shqipëri në vitin 2010, duke u renditur pas faktorëve të rrezikut të lidhur me dietën dhe presionin e lartë të gjakut. Duhanpirja ishte përgjegjëse për një rritje prej më shumë se dy herë të Nivelit të Vdekshmërisë Bruto nga kanceri i trakesë, bronkeve dhe mushkërive. Në vitin 2010, rreth 84% e vdekjeve nga këto kancere u shkaktuan nga duhanpirja[1].
Sipas studimit të bazuar në popullatë mbi përdorimin e substancave abuzive (2014), prevalenca e duhanpirjes aktuale rezultoi 27% (43% meshkuj kundrejt 11% në femra, P <0.001). Nga ana tjetër, prevalenca e duhanpirjes gjatë jetës ishte 41% (63% në meshkuj vs.20% në femra, P <0.001)[2].
Në studimin e kryer me fëmijë të moshës shkollore, 11, 13 dhe 15 vjeç (2014), rezultoi se rreth 4% e fëmijëve të intervistuar raportonin konsum të rregullt të duhanit[3].
Nga ana tjetër, në Studimin Europian në Shkolla për Drogat (ESPAD, 2015)[4] të realizuar me nxënës të moshës 15-16 vjeç, rezultoi se rreth 345% e pjesëmarrësve kanë konsumuar duhan të paktën një herë në jetën e tyre. Prevalenca e konsumit të duhanit gjatë jetës ishte më e lartë te djemtë sesa te vajzat (47.1% vs. 24.8%, përkatësisht), në shkollat private (44.4%) sesa publike (33.6%), shkollat urbane sesa rurale (38.9% vs. 25.6%) dhe te shkollat tekniko-profesionale (61%). Krahasuar me vitin 2011, në vitin 2015 u vu re një ulje e prevalencës së duhanpirjes gjatë jetës në tërësi, me përjashtim të shkollave profesionale. Ulja midis vajzave ishte më e vogël sesa midis djemve.
[1] http://ishp.gov.al/wp-content/uploads/2015/04/Health-report-English-version.pdf
[2]http://www.emcdda.europa.eu/attachements.cfm/att_233186_EN_GPS_Albania_2014.pdf
[3] http://www.euro.who.int/en/publications/abstracts/growing-up-unequal-gender-and-socioeconomic-differences-in-young-peoples-health-and-well-being.-health-behaviour-in-school-aged-children-hbsc-study-international-report-from-the-20132014-survey
[4] www.ishp.gov.al, ESPAD, 2015
Materiali është marrë nga faqja zyrtare e Institutit të Shëndetit Publik www.ishp.gov.al,
by FSDKSH | Jan 9, 2019 | Aktivitete
Duke patur në vëmendje komunitetin, mbulimin shëndetësor, financimin e drejtë dhe nevojën për të qenë solidarë, në atë që është e drejtë e patjetërsueshme, “e drejta për kujdes shëndetësor”, Këshilli Administrativ i Fondit, në mbledhjen e radhës miratoi Listën e Barnave të Rimbursuara 2017 e cila u shtua me 30 barna të reja. Barna të cilët ndihmojnë në trajtimin e shumë sëmundjeve veçanërisht atyre tumorale, sëmundjeve kardiake dhe të diabetit.
Barnat dhe indikacionet përkatëse të shtuara në Listën e Barnave të Rimbursuara për vitin 2017
Dy barna anti diabetikë, një bar kundër obezitetit në pacientët që vuajnë nga diabeti dhe sëmundje kardiologjike, një bar për Mukopolisakaridozë tipi VI për shërbimin e Pediatrisë, gjashtë barna kardiologjik të cilët mundësojnë trajtimin e pacientit nga monoterapia në terapi me kombinime të ndryshme, katër barna për shërbimin e nefrologjisë.
Gjithashtu në Listën e Barnave të Rimbursuara 2017 janë shtuar dhe tre barna në doza të ndryshme për shërbimin e Psikiatrisë.
- Bar për Sklerozën e shumëfishtë recidive remitente
- Bar për shërbimin e Reumatologjise/Dermatologjisë për sëmundjen e psoriazes.
Tre barna onkologjik me rëndësi për pacientët që vuajnë nga sëmundje tumorale, të cilët shkurtojnë kohën e hospitalizimit.
Lista e barnave këtë vit është vlerësuar dhe në aspektin kosto efikasitet, janë mundësuar kështu barna më cilësor me një kosto më të ulët, duke zgjeruar dhe më tej gamën e barnave të rimbursueshëm.
Zgjerimi i listës së barnave do të thotë mbulim me barna të rimbursuara për pjesën më të madhe të sëmundjeve, në parim të mbulimit universal me shërbim shëndetësor të popullatës.
Lista e re parashikohet të hyjë në fuqi me datën 1 Maj 2017.
Paketat Shëndetësore që mbulohen nga Fondi
Fondi financon shërbimet shëndetësore nga ofrues publikë dhe privatë, në përputhje me politikat kombëtare të kujdesit shëndetësor. Financimi i shërbimeve shëndetesore është qëllimi kryesor i Fondit të Sigurimit të Detyrueshëm të Kujdesit Shëndetësor, në këtë kontekst në mbledhjen e Këshillit Adninistrativ të Fondit u miratuan dhe paketat e shërbimeve të rishikuara si më poshtë;
Paketa e shërbimit të dializës, përmbajtja e paketës së shërbimit të dializës (protokolli) ku përcaktohen vizitat, ekzaminimet, trajtimet mjekësore si dhe çmimet përkatëse të llogaritura në zbatim të Vendimit të Këshillit Administrativ nr. 52, datë 10.12.2013, “Për rregullat e funksionimit të komisionit teknik të paketës së shërbimit të dializës”.
Paketa e shërbimit të implantit koklear, u rishikua përmbajtja e paketës së shërbimit të implantit koklear (protokolli) duke përcaktuar vizitat, ekzaminimet, trajtimet mjekësore, si dhe çmimet përkatëse të llogaritura në zbatim të Vendimit të Këshillit Administrativ nr. 3, datë 13.01.2014, “Për rregullat e funksionimit të komisionit teknik të implantit koklear”.
Paketa e shërbimit të kardiologjisë dhe kardiokirurgjisë, u rishikua përmbajtja e paketës së shërbimit të kardiologjisë dhe kardiokirurgjisë (protokollet) duke përcaktuar vizitat, ekzaminimet, trajtimet mjekësore si dhe çmimet përkatëse në përputhje me rregullat e parashikuara në Vendimin e Këshillit Administrativ nr. 56, datë 10.12.2013, “Për rregullat e funksionimit të komisionit teknik të paketave të shërbimit të kardiologjisë dhe kardiokirurgjisë”.
Po kështu u rishikua dhe paketa e shërbimit të transplantit të veshkës, duke riparë përmbajtjen e paketës së shërbimit të transplantit të veshkës (protokolli) duke përcaktuar vizitat, ekzaminimet, trajtimet mjekësore, si dhe çmimet përkatëse në përputhje me Vendimin e Këshillit Administrativ nr. 54, datë 10.12.2013, “Për rregullat e funksionimit të komisionit teknik të paketës së transplantit të veshkës”.
Filozofia e rishikimit të paketave dhe të rregullave të përfitimit të tyre, është një qasje për të përfshirë më shumë pacient në skemën e mbulimit shëndetësor.
by FSDKSH | Jan 8, 2019 | Aktivitete
Tiranë, 09/02/2017 – Nënshkrimi elektronik është një tjetër hap tejet i rëndësishëm drejt Shëndetësisë Elektronike. Prezantimi i tij u bë këtë herë para mjekëve, infermierëve dhe punonjësve të sistemit të kujdesit Parësor shëndetësor të Tiranës, ku ishin të pranishëm Ministri i Shëndetësisë, z. Ilir Beqaj, si dhe Ministrja e Shtetit për Inovacionin dhe Administratën Publike, zj. Milena Harito.
Në fjalën e tij, z. Beqaj tha se nënshkrimi elektronik është një pjesë e rëndësishme e programit të Shëndetësisë Elektronike, teksa shtoi se të gjitha projektet që janë zbatuar deri më tani, ato që po zbatohen, si dhe ato që do të zbatohen së afërmi dhe që lidhen me “e-Health”, kanë një vlerë prej 36 milionë euro.
“Ajo që prezantojmë sot është një pjesë e të gjithë puzzle-it të shëndetësisë elektronike që duam të krijojmë. Praktikisht, duhet të kemi parasysh që kemi zbatuar, po zbatojmë dhe kemi të alokuara fonde për të zbatuar së afërmi projekte që lidhen me “e-Health”-in që janë 36 milionë euro”, deklaroi z.Beqaj.
Kreu i Shëndetësisë, theksoi se përdorimi sa më efektiv i teknologjisë është, në radhë të parë lehtësim për punën për punën e mjekut, rrit cilësinë, si dhe shmang burokracitë e tepërta, duke ulur kohën e pritjes për pacientët.
“Është shumë e rëndësishme që t’i shfrytëzojmë sa më mirë, në radhë të parë për të lehtësuar punën tuaj, për të rritur cilësinë e punës tuaj, dhe besojmë se, gradualisht, do të lehtësojmë edhe kujdesin shëndetësor që ofrojmë ndaj pacientëve, sidomos në uljen e kohës së pritjes, radhëve të pritjes dhe barrës administrative”, nënvizoi z. Beqaj.
Tashmë kemi një Kartë Shëndeti që jepet dhe elektronikisht. Kemi një regjistër të “Check-Up”-it, i cili administrohet elektronikisht dhe qytetarët nga portali “e-Albania”, mund të futen dhe të shohin rezultatet e tyre. Këto ditë, nga web-i i Fondit, në një dritare shumë të thjeshtë, çdo qytetar mund të fusë numrin e identitetit, dhe gjen si përgjigje, Qendrën Shëndetësore edhe mjekun e tij të familjes. Regjistri i qytetarëve, tashmë i populluar me rreth 3.8 milionë rekorde, është elektronik. Po fillohet me Recetën Elektronike dhe do të prezantohet në vijim Referimin Elektronik.
Të gjithë këto sisteme është shumë e rëndësishme që t’i shfrytëzojmë sa më mirë, në radhë të parë për të lehtësuar punën e mjekut. Për të rritur cilësinë e punës dhe gradualisht, do të lehtësohet edhe kujdesi shëndetësor që ofrojmë ndaj pacientëve, sidomos në uljen e kohës së pritjes, radhëve të pritjes dhe barrës administrative. Receta Elektronike, apo Referimi Elektronik, nuk e përmirësojnë direkt shëndetin në qoftes se je i sëmurë. por përdorimi i tyre në mënyrë sa më efektive duhet të sjellë një rritje të cilësisë së shërbimit.
Për më tepër klikoni në link më poshtë:
http://www.shendetesia.gov.al/al/newsroom/lajme/nenshkrimi-elektronik-lehtesim-per-mjeket-dhe-pacientet
by FSDKSH | Jan 1, 2019 | Aktivitete
Fondi i Sigurimit të Detyrueshëm të Kujdesit Shëndetësor sqaron qytetarët dhe posaçërisht pacientët që marrin falas me barnat që trajtojnë sëmundjen e Talasemisë se trajtimi i tyre do të jetë i njëjtë, madje i përshtatur sipas peshës trupore të pacientëve. Në listën e re të barnave të rimbursueshme 2018 janë shtuar 2 alternativa të reja që trajtojnë këtë sëmundje. Bëhet fjalë për 2 formëdoza të reja të të njëjtit bar, me konkretisht formëdoza deferasirox 125 mg dhe 500 mg, të cilat janë më të përshtatshme për pesha të ndryshme trupore (duke ditur se trajtohen me këtë bar kryesisht fëmijë) Bari Deferasirox 250 mg (Enferox) është alternativa xhenerike e njëjtë me barin tjetër Deferasirox 250 mg (Exjade). Pacientët do të trajtohen njëlloj sepse bari ka të njëjtin princip aktiv dhe është i liçencuar dhe i aprovuar, sipas legjislacionit në fuqi.
Pacientët që vuajnë nga talasemia përfitojne kurën e plotë pa pagesë.
by FSDKSH | Jan 19, 2018 | Aktivitete
Këshilli Administrativ i Fondit të Sigurimit të Detyrueshëm të Kujdesit Shëndetësor, me vendim nr.54, datë 19.05.2017 miratoi emërimin e Z. Eduard Ahmeti në detyrën e Drejtorit të Përgjithshmëm të Fondit të Sigurimit të Detyrueshëm të Kujdesit Shëndetësor.
Zoti Ahmeti merr këtë detyrë të rëndësishme, pas një eksperience të gjatë dhe të suksesshme në fushën administrative dhe konkretisht pas drejtimit të Agjencisë së Prokurimit Publik, detyrë të cilën e ka ushtruar prej Shkurtit të vitit 2014.
Zoti Ahmeti ka përfunduar studimet e larta në fushën e jurisprudencës në Fakultetin e Drejtësisë në Tiranë në vitin 2003. Ai ka një përvojë të gjatë pune si avokat, i specializuar kryesisht në cështjet administrative, tregtare, civile, pasurive të paluajtshme, etj.
Zoti Ahmeti ka mbajtur një sërë postesh të rëndësishme në administratën shtetërore si, Kryeadministrator i Agjencisë së Administrimit të Pasurive të Sekuestruara dhe të Konfiskuara, Inspektor në Komisionin Qendror të Zgjedhjeve, etj.
Drejtori i Përgjithshëm merr detyrën e rëndësishme të drejtimit të Fondit të Sigurimit të Detyrueshëm të Kujdesit Shëndetësor në momentin kur ky institucion është angazhuar në përmbushjen e misionit të tij dhe në mirëmenaxhimin e fondeve të buxhetit të shtetit, duke rritur cilësinë e shërbimit dhe transparencës ndaj qytetarëve.
by FSDKSH | Oct 30, 2017 | Aktivitete
Rritet ndërgjegjësimi I popullatës, në 6 muaj 225,643 qytetarë kryen Kontrollin Mjekësor Bazë
Sëmundjet kardiovaskulare, diabeti dhe tumoret, 84,754 raste referohen te mjekët specialistë
Programi kombëtar i Kontrollit Mjekësor Bazë për grupmoshën 35-70 vjeç po jep frytet e veta jo vetëm sa i takon krijimit për herë të parë të një database mjekësore për sëmundshmërinë por edhe për identifikimin, diagnostikimin dhe parandalimin e sëmundjeve invalidizuese me kosto të lartë sociale dhe financiare. Ajo që vihet re referuar të dhënave zyrtare është rritje e ndërgjegjësimit të popullatës për vetë rëndësinë që mbart kontrolli mjekësor bazë për identifikimin e çdo problematike shëndetësore që ky kontroll mjekësor vlerëson, nëpërmjet setit të analizave që çdo qytetar i moshës 35-70 vjeç ka mundësi të kryejë falas, çdo vit.
Duke u mbështetur në të dhënat për 6 mujorin e parë 2018 në total janë kryer 225,643 kontrolle mjekësore bazë në rang vendi, duke treguar një interes të lartë të popullatës për ta kryer Kontrollin Mjekësor Bazë.
Në të gjithë rajonet ka një rritje të konsiderueshme të numrit të kontrolleve check up në vlerë absolute.
Analizimi i treguesve statistikor të kontrollit mjekësor bazë gjatë këtij viti vlerësojnë se nga kontrolli i kryer kanë rezultuar 19% me rrisk të lartë, 34% me risk të moderuar dhe 47% me rrisk të ulët.
Rritja e numrit të kontrolleve mjekësore bazë, ka sjell diagnostikim të hershëm të sëmundjeve, ku përqindja e rasteve të referuara nga kontrolli mjekësor bazë për periudhën janar – qershor 2018 rezultojnë: rreth 84,754 raste janë referuar tek mjeku specialist.
Ndër këto: 49.61 % të rasteve janë referuar tek mjeku kardiolog, për sëmundje kardiovaskulare, 20.14 % janë referuar me Diabet Mellitus tek mjeku Endokrinolog, 10 % janë referuar për tek mjeku Hematolog.
Diagnostikimi i hershëm jo vetëm përmirëson cilësinë e shëndetit të popullatës por lehtëson koston e trajtimit të pacientëve si dhe drejton në mënyrë të drejtë politikat shëndetësore.
