Karta e Shëndetit online, vetëm me dokumentin e identifikimit

9Njoftim, 25 Shkurt 2016

Prej 15 shkurtit ka nisur shpërndarja online e Kartës së Shëndetit. Kjo mënyrë e re e aplikimit bën të mundur pajisjen e qytetarëve me Kartën e Shëndetit me anë të një dokumenti të vetëm, Kartës së Identitetit.

Prezantimi i këtij projekti u zhvillua gjatë ditës së sotme në Qendrën Shëndetësore nr.9 në Tiranë ku morën pjesë Kryeministri Z. Edi Rama, Ministrja e Inovacionit dhe Administratës Publike, Milena Harito, Drejtorja e Përgjithshme e Fondit të Sigurimit të Kujdesit Shëndetësor, Znj Vjollca Braho, Drejtorja e Agjencisë Kombëtare të Shoqërisë së Informacionit, Mirlinda Karçanaj dhe Zëvendës Ministri i Shëndetësisë, Klodian Rrjepaj. Falë këtij shërbimi është bërë e mundur eleminimi i ecejakeve të qytetarëve për tu pajisur me dokumenta të tjera shtesë që nevojiteshin për tu pajisur me kartë shëndeti. “Informatizimi i këtij shërbimi bën të mundur lidhjen dhe marrjen në kohë reale të informacionit në disa institucione njëherësh, regjistrin e Gjendjes Civile, regjistrin e pensioneve, regjistrin e kontribuuesve, regjistrin e punëkërkuesve, si dhe regjistrin e ndihmës ekonomike. Për qytetarët, kjo eliminon një radhë dokumentash që nevojiteshin deri dje, redukton vajtje-ardhjet nga një zyrë në tjetrën dhe shkurton kohën e shërbimit”, deklaroi Znj. Braho, gjatë prezantimit të sistemit. Duke vënë theksin në përparësitë që ka aplikimi i sistemeve informative, Braho sqaroi se bashkë me recetën elektronike mundëson kontrollin online të sistemit. “Me përfundimin e recetës elektronike në të gjithë Shqipërinë, pas realizimit me sukses në qytetin e Durrësit, bëhet e mundur që ne të kemi nën kontroll të gjithë sistemin, duke filluar që  nga vizita tek mjeku i familjes, pajisja me recetën elektronike, marrja e ilaçeve në farmaci”, u shpreh Vjollca Braho. Ndërkohë, Kryeministri i vendit, Z. Edi Rama theksoi se tani falë këtij sistemi jo vetëm janë eleminuar rradhët e gjata të qytetarëve edhe u janë ofruar një sërë lehtësish të tjera. “Për të çmontuar të gjithë atë barrë të tmerrshme që kishin dhe vazhdojnë të kenë në zona të ndryshme njerëzit dhe mjekët, duhet paralelisht me ndryshimet strukturore, edhe një reformim rrënjësor i formës së shërbimit dhe kalimin në shërbimin shëndetësor elektronik. Receta elektronike, nga njëra anë, Karta e Shëndetit e marrë elektronikisht, nga ana tjetër janë dy hapa, jo të gjitha, që sjellin një lehtësi shumë të madhe. Përfundimisht, të gjithë ato radhë të tmerrshme, që i përjetuam edhe nëpërmjet televizionit në zona të ndryshme, evitohen plotësisht dhe e gjitha funksionon shpejt, por më e rëndësishme, në mënyrë transparente dhe në mënyrë të tillë që çdo gjë e shkruar mbetet aty,” u shpreh Kryeministri Rama. Ndërkohë falë mbështetjes së dhënë edhe nga Agjencia Kombëtare e Shoqërisë së Informacionit, të gjithë qytetarët që janë të regjistruar në regjistrin e pacientëve pranë mjekut të tyre të familjes mund të futen në portalin qeveritar e-albania dhe ta printojnë vetë Kartën e Shëndetit pa qenë nevoja të paraqiten në sportelet e Fondit. Shpërndarja e Kartës së Shëndetit ka nisur në dhjetor të vitit 2014 dhe gjatë vitit të shkuar u shpërndanë rreth 692 500 karta. Nga janari i këtij viti deri më tani janë shpërndarë mbi 320 mijë Karta Shëndeti.

 

18 Shkurt 2016 – Drejtoresha e Përgjithshme e Fondit në Analizën vjetore të Drejtorisë Rajonale, Tiranë

Gjatë analizës vjetore të punës së Drejtorisë Rajonale të Fondit të Sigurimit të Detyrueshëm të Kujdesit Shëndetësor të Tiranës, Drejtoresha e Përgjithshme e Fondit znj. Vjollca Braho vuri theksin në atë ç’ka duhet bërë jo vetëm në drejtim të rritjes së kontrollit të punës që nga mjeku i familjes deri të farmacisti por edhe në përmirësimin e cilësisë së shërbimit që duhet t’u ofrojmë qytetarëve. 

Falë punës tonë ne do t’i kthejmë imazhin e humbur DRFSDKSh-së Tiranë!- u shpreh më tej znj.Braho

 

19 Shkurt 2016 – Drejtoresha e Përgjithshme e Fondit në Analizën vjetore të Drejtorisë Rajonale, Vlorë

Znj. Vjollca Braho në Drejtorinë Rajonale të Fondit të Sigurimit të Detyrueshëm të Kujdesit në Vlorë për të parë nga afër situatën dhe për të vendosur objektivat e punës për vitin 2016.

“Me punë çdo ditë do të realizojmë atë që qytetarët presin nga ne! Tashmë po përfundojmë testimet e fundit dhe brenda pak ditësh Karta e Shëndetit do të kalojë on line. Eleminojmë sorollatjet e qytetarëve! Shkurtojmë kohën! Përmirësojmë shërbimin!…”- theksoi në fjalën e saj znj.Braho.

28 KORRIK – DITA BOTERORE E HEPATITIT

Çdo vit në 28 korrik, Organizata Botërore e Shëndetësisë (OBSH) organizon Ditën Botërore të Hepatitit për të rritur informimin dhe ndërgjegjësimin për hepatitin dhe pasojat që ai shkakton.

 

128 korrik është zgjedhur si Dita Botërore e Hepatitit në nder të ditëlindjes së profesor Baruch Blumberg Samuel, zbuluesit të virusit të hepatitit B dhe vaksinës së parë të hepatitit B.

 

Në Ditën Botërore të Hepatitit 2016, Organizata Botërore e Shëndetësisë (OBSH) u bën thirrje politikëbërësve, stafit shëndetësor dhe publikut :

“Të njohin hepatitin, të veprojnë tani!”

OBSH-ja bën thirrje që të informohemi në lidhje me infeksionin, të ndërmarrim nisma pozitive për të njohur statusin e infektimit me virusin e hepatiteve duke u testuar, dhe së fundi, të kërkojmë trajtim për të reduktuar vdekjet e panevojshme nga ky infeksion i parandalueshëm dhe i trajtueshëm.

Mesazhet kryesore të Ditës Botërore të Hepatitit 2016

Njih hepatitin – A JE NË RREZIK?

Hepatiti viral B dhe C prek 400 milionë njerëz në gjithë botën. 130-150 milionë njerëz kanë hepatit kronik C. Hepatiti shkakton 80% të vdekjeve prej kancerit të mëlçisë. Duke pasur parasysh madhësinë e epidemisë, çdokush dhe të gjithë mund të jetë në rrezik.

Njih hepatitin – TESTOHU!

Rreth 95% e njerëzve me hepatit nuk janë në dijeni të infeksionit të tyre. Në shumë vende, testet e hepatitit janë komplekse dhe mund të jenë të kushtueshme, por udhëzuesi i OBSH-së mbi testimin për hepatitin do t’u japë vendeve këshilla për strategji të thjeshta testimi që do t’i ndihmojnë ata për të mundësuar shërbime testimi për hepatitin.

Njih hepatitin – KËRKO TRAJTIM!

Globalisht, mungesa e ndërgjegjësimit dhe qasja e dobët ndaj shërbimeve të trajtimit të hepatiteve do të thotë se, shumica e njerëzve që kanë nevojë për trajtim nuk e marrin atë.
Mbi 90% e njerëzve me hepatit C mund të shërohen plotësisht nga virusi brenda 3-6 muajve.
Trajtimi i duhur i hepatitit B dhe C mund të parandalojë zhvillimin e shumicës së komplikacioneve të rrezikshme për jetën prej sëmundjeve kronike të mëlçisë shkaktuar nga hepatiti; cirozë dhe kancer i mëlçisë.
OBSH-ja këshillon që me rritjen e shkallës së trajtimit, 7 milionë jetë mund të shpëtohen mes viteve 2015 dhe 2030, me mjaft përfitime ekonomike.

Hepatiti viral – një grup i sëmundjeve infektive të njohura si hepatiti A, B, C, D dhe E – ndikon jetën e qindra miliona njerëzve në mbarë botën, duke shkaktuar sëmundje akute dhe kronike të mëlçisë dhe vrasjen e afër 1.4 milionë njerëzve çdo vit, kryesisht nga hepatiti B dhe C. Është vlerësuar se vetëm 5% e njerëzve me hepatit kronik e dinë që janë të infektuar, dhe më pak se 1% e tyre kanë qasje në trajtim.

Burimi: ISHP /http://shendeti.com.al/

 

NJOFTIM PER SHTYP – Mbi ecurinë e deritanishme të procesit të shpërndarjes së Kartës së Shëndetit

Duke pasur parasysh që afatit i fundit për përdorimin e librezave të shëndetit skadon në datën 30 prill 2016, Fondi i Sigurimit të Detyrueshëm të Kujdesit Shëndetësor i bën apel të gjithë qytetarëve të paraqiten në sportelet tona ose të aplikojnë përmes portalit www.ealbania.al për t’u pajisur me këtë dokument.

Duke parë fluksin e lartë të kërkesave për tu pajisur me kartë shëndeti, FSDKSH jo vetëm hapi 97 sportele në të gjithë vendin, por falë aplikimit të sistemeve informatike eleminoi një sërë dokumentesh të nevojshme që duhet të paraqisnin qytetarët duke u dhënë mundësi që të marrin kartën e shëndetit vetëm nëpërmjet kartës së identitetit. Gjithashtu falë bashkëpunimit me portalin qeveritar ealbania është bërë e mundur që qytetarët të aplikojnë dhe të gjenerojnë kartën e shëndetit pa qenë nevoja të paraqiten në sportelet tona. FSDKSH-ja njofton qytetarët se pas datës 30 prill në të gjitha institucionet shëndetësore në vend nuk do të shërbehet për qytetarët e pa pajisur me kartë shëndetit. Për eleminuar radhët e qytetarëve, të gjitha sportelet e përcaktuara për shpërndarjen e kartës së shëndetit punojnë çdo ditë deri në orën 20:00 gtë mbrëmjes.

I nisur si projekt që prej dhjetorit të vitit 2014, shpërndarja e Kartës së Shëndetit gjeti zbatim plotësisht gjatë vitit të shkuar ku u shpërndanë rreth 692 500 karta. Ky proces po vazhdon me ritme të larta edhe gjatë këtij viti, ku nga janari deri ditën e sotme janë shpërndarë mbi 539 998 karta shëndeti. Edhe falë aplikimit në portalin www.ealbania.al janë lëshuar on line 6 955 karta shëndeti, ndërkohë që janë gjeneruar nga vetë qytetarët  3826 karta, ndërkohë që në total janë lëshuar 1 232 424 karta shëndeti. Karta e Shëndetit është dokumenti i vetëm identifikues pranë dhënësve të shërbimit i kategorive të përfitimit për të gjithë popullsinë.

Përdorimi i kartës së shëndetit ka sjellë një sërë lehtësish jo vetëm në përmirësimin e cilësisë së shërbimit ndaj qytetarëve, por edhe të dhënies së një pasqyre të qartë të të gjitha grupëmoshave dhe kategorive të përfituesve që paraqiten për të marrë shërbim pranë mjekut të familjes. Përdorimi i kësaj karte ka kthyer rolin e mjekut të familjes në funksion të shërbimit ndaj pacientëve, pasi ata nuk janë më të detyruar të plotësojnë fletë libreze pa fund, por me një mjet të thjeshtë, kartën e shëndetit, pacientët marrin shërbim e duhur dhe mjeku do shfrytëzojë kohën për të vizituar sa më mirë pacientët, duke fituar dinjitetin dhe rolin që i takon. Përdorimi i kartës ka bërë të mundur gjithashtu lidhjen e regjistrit të të siguruarve me regjistrin e pacientëve, ndërkohë që ka rritur presionin mbi mjekun për të mbajtur të përditësuar regjistrin e pacientëve, çka i ka mundësuar atij që të  informohet elektronikisht për kategorinë për të cilën personi është i siguruar.